21-nji ýanwarda BMG-niň Aşgabatdaky binasynda howanyň üýtgemegine uýgunlaşmak boýunça taslamalara bagyşlanan tegelek stol geçirildi. Bu çäre Türkmenistanda uýgunlaşmak meýilnamasyny işläp düzmek bilen baglanyşykly BMGÖM-niň taslamasynyň çäklerinde guraldy.
BMGÖM-niň halkara hünärmenleri Nikolaý Denisow we Wiktor Nowikow, "Hemmeler üçin klimat hyzmatlary" atly taslamanyň soňky görnüşini hem-de ekoulgamlara esaslanýan uýgunlaşma çäreleri boýunça taslama konsepsiýasyny hödürlediler. Bu taslamalar Ýaşyl Klimat Gaznasyndan maliýe goldawyny almagy maksat edinýär.
Maslahata Türkmenistanyň dürli ministrlikleriniň we edaralarynyň wekilleri, şol sanda Oba hojalygy we daşky gurşawy goramak ministrlikleriniň, Döwlet weterinariýa gullugynyň, Saglygy goraýyş we derman senagaty ministrliginiň, Suw hojalygy baradaky döwlet komitetiniň we “Türkmenhowaýollary” agentliginiň wekilleri gatnaşdylar.
Tegelek stoluň dowamynda hödürlenen taslamalaryň durmuşa geçirilmegi boýunça indiki ädimler ara alnyp maslahatlaşyldy.
