“Mançester Siti” Özbegistanyň milli ýygyndysynyň merkezi goragçysy Abdukodir Husanowy satyn alandygyny resmi taýdan habar berdi. Onuň şertnamasy 2029-njy ýyla çenli hereket eder.
KHBS-iň maglumatlaryna görä, “ManSiti” 20 ýaşly futbolçynyň transferi üçin “Lans” klubuna bonuslar bilen birlikde 50 mln ýewro töledi – bu fransuz kluby üçin rekord mukdar (Husanow 2024-nji ýylyň jemi boýunça “Lansyň” iň gowy oýunçysy diýlip ykrar edildi). Insaýder Fabrisio Romano şertnamada hökmany tölenmeli mukdaryň 40 mln ýewrodygyny aýdypdy.
Bellenilişi ýaly, oýunçynyň transferi üçin “Bunýodkor” özbek kluby, takmynan, 800 müň ýewro alar – bu klubuň oýunçyny 12 ýaşyndan bäri terbiýeländigi üçin raýdaşlyk tölegidir. Husanow “Energetik-BGU” belarus klubunda hem az wagtlyk oýnady, şonuň üçin bu klub hem öz paýy üçin dalaş edýär.
Husanow iňlis klubunda 45-nji belgini aldy. Ol taryhda Angliýanyň Premýer-ligasynda ilkinji özbek futbolçydyr.
Žurnalistleriň maglumatlaryna görä, öň futbolça Madridiň “Realy”, Angliýanyň “Tottenhem Hotspur”, “Çelsi”, “Nýukasl Ýunaýted”, şeýle-de Fransiýanyň “Pari Sen-Žermen” kluby gyzyklanma bildirdi.
Abdukodir milli ýygyndyda çykyş eden özbek futbolçysy Hikmat Haşimowyň ogludyr. Abdukodir atasynyň familiýasyny göterýär – kakasy ony ýaş futbolçyny erkine goýbermezlikleri we “ýyldyz keselinden” goramak üçin üýtgetdi diýip, Daryo.uz neşiri ýazýar.
