Hytaýyň Çanszi uniwersitetiniň 23 ýaşly talyby Alapati Ýimaýer ýüpde bökmegiň sany boýunça täze dünýä rekordyny goýdy. Ol bir minutda 388 gezek bökdi we bu sekuntda 6 böküşden gowrakdyr diýlip, Ginnesiň rekordlar kitabynda aýdylýar.
“Bökmegi gutaranymdan soň, aýaklarym titreýärdi, “beýnim” bolsa öçdi” – diýip, türgen belledi.
Alapati rekorda tarap ýoluny orta mekdepde, ýönekeý bir güýmenjeden başlady. Ýöne wagtyň geçmegi bilen başarnygynyň bardygyna düşünip, türgenleşiklere has çynlakaý çemeleşip başlady.
Ol Çanszi uniwersitetinde ýüpde bökmek boýunça topara goşuldy, bu ýerde tälimçi Çen Binszeniň ýolbaşçylyk etmeginde geçirilen türgenleşikler onuň üstünlik gazanmagynda möhüm rol oýnady.
“Tälimçi Çen maňa diňe bir tehnikany öwretmedi – ol meniň ritmimi kämilleşdirdi we meniň, aýratynam, garşydaşlar tarapyndan basyşyň bar şertlerinde psihologiki durnuklylygymy güýçlendirdi” – diýip, rekord eýesi belledi.
2024-nji ýylyň oktýabrynda Ýimaýer ýüpde bökmek boýunça Hytaýyň Açyk çempionatynda üç minutda bökmek boýunça erkekleriň arasynda çempion titulyny gazandy.
Ýeňişden soň, ol Ginnesiň rekordyny täzelemäge ukyplydygyna düşündi. Ýöne bu aňsat bolmady.
“Üç minutlyk böküş – bu çydamlylyk, bir minutlyk bolsa – partladyjy güýç. Ilkibaşda intensiwlik çydar ýaly däldi. Aýaklarym şeýle bir güýçli agyrýardy welin, men ýatyp bilemokdym, ýöne her gezekki sähel kämilleşme meni maksada ýakynlaşdyrdy” – diýip, türgen paýlaşýar.
Üstünlik gazanandan soň bolsa, ýaş ýigit hatda baýram etmäge güýjüniň bolmandygyny belleýär.
Indi Alapati tälimçi bolup, beýlekileri ruhlandyrmak isleýär.
“Erjel boluň. Siz synanyşyp görýänçäňiz öz çägiňizi bilmersiňiz” – diýip, ol maslahat berýär.
