Google kompaniýasy “Gemini” dil modeliniň täze funksiýasyny hödürleýär. Bu funksiýa ulanyjylara YouTube wideolary we PDF resminamalary bilen şol bir wagtda işlemäge mümkinçilik berer diýip, Android Authority habar berýär.
“Talk Live about video” atly funksiýa arkaly ulanyjylar görýän wideolaryndaky gyzyklanýan we düşünmeýän ýerleri boýunça emeli aň bilen sorag-jogap alşyp bilerler. Munuň özi mazmuna has gowy düşünmäge, goşmaça maglumat almaga ýa-da çylşyrymly zatlary çözmäge ýardam berer.
Şeýle mümkinçilik PDF resminamalary üçin hem peýda bolar. “Talk Live about PDF” atly funksiýa talyplar we barlagçylar üçin peýdalydyr. Ol maglumaty elýeterli we interaktiw formatda hödürleýär.
Gemini Google-yň emeli aň (AI) programmalaryny ösdürmek strategiýasynyň bir bölegidir. 2025-nji ýylda Gemini Google TV enjamlarynda Google Assistentiň ýerine geçer. Şeýle-de ol “akylly öý” ulgamlaryny dolandyrmak üçin synagdan geçirilýär.
Gemini sesli soraglara jogap bermek ukyby bilen tapawutlanýar. Bu bolsa Google önümlerini ulanmagy has amatly we maglumata elýeterli edýär.
