ABŞ-nyň Gymmatly kagyzlar we biržalar boýunça komissiýasy (SEC) sişenbe güni Ilon Maskyň üstünden kazyýete arza berdi. Düzgünleşdiriji milliarderi 2022-nji ýylda 44 milliard dollara Twitter-i (häzirki X) satyn alanda gymmatly kagyzlar hakyndaky kanuny bozmakda günäleýär. Arzada ol degişli görnüşde habar bermezden, paýnamalardan uly paý almakda aýyplanýar diýip, CNBC habar berýär.
Kanun boýunça maýa goýujy kompaniýanyň paýnamalarynyň 5% -den gowragyny alanda, bu barada 10 günüň içinde halka habar bermelidir. ABŞ-nyň Waşington şäherindäki okrug kazyýetinde gozgalan raýat kazyýet işine görä, Mask öz emlägi barada 10 günden gijikdirip habar beripdir.
SEC şu sebäpli Tesla-nyň we SpaceX-iň ýolbaşçysynyň "maliýe peýdasy baradaky hasabaty bereninden soň satyn alan paýlary üçin, azyndan 150 million dollar kem töländigini" tassyklaýar. Düzgünleşdiriji maýa goýujylar telekeçiniň satyn almalary barada wagtynda bilen bolsalar, paýnamalaryň bahasyny ýokarlandyryp bilerdiler diýip hasaplaýar.
SEC ozal Maskyň ýa-da onuň bilen işleşen başga biriniň Twitter hakyndaky habaryň aýan edilmegi bilen baglanyşykly 2022-nji ýylda gymmatly kagyzlar babatda galplyklary edendigini-etmändigini derňäpdi.
Geçen aý Mask X-da SEC-iň özünden "parahatçylykly ylalaşyga gelmegi" talap edýändigini, ony 48 sagadyň dowamynda ylalaşmaga we jerime tölemäge mejbury razy etjek bolýandygyny, ýogsam paýnamalary satyn alandygy üçin "kanunyň köp bölekleri boýunça aýyplamalaryň garaşýandygyny" aýdandygyny ýazdy.
Maskyň aklawçysy Aleks Spiro bu kazyýet işini "galplyk" we "köp ýyllap dowam eden yzarlamalar kampaniýasynyň" netijesi diýip atlandyrdy.
Mask, kazyýete arza berlenden soň, X sosial ulgamynda SEC-i "jezasyz galýan hakyky jenaýatlar köp bolsa-da, şuňa meňzeş zatlara ünsi jemleýän, bütinleý ýykylan gurama" diýip atlandyrdy.
