Hytaýyň taryhy şäheri Sianda “Heatherwick Studio” tarapyndan döredilen dikligine seýilgäh – syn ediş meýdançasy açyldy. Gülleri we ýapraklary ýada salýan eýwanlary bilen bu bina myhmanlara ajaýyp görnüşlerden lezzet almaga şert döredýär diýip, New Atlas habar berýär.
Sian Agajynyň (Xi’an Tree) beýikligi 57 metrdir. Onuň 56 eýwany we basgançak görnüşindäki baglary bar. Seýilgäh üçin saýlanyp alnan ösümlikler Beýik Ýüpek ýolunyň ugrundaky dag tundrasyndan çölleşen düzlüklere çenli tebigatyň köpdürlüligini görkezýär. Binanyň iň ýokarsynda bolsa bag ýerleşýär.
“Botanika bagy ýaly, her bölümde ösümlikleriň üýtgeşik görnüşlerini görmek bolýar. Olaryň köpüsi bilen öň tanyş dälsiňiz. Aşakdaky eýwanlarda gezip ýören pyýadalaryň has ýokarsyndan, Sian şäheriniň täze we köne medeniýetleriniň utgaşmasyna syn edip bilersiňiz” diýip, Heatherwick Studio ýazýar.
Agaç şekilindäki bu seýilgäh şeýle-de onuň tutuş töwereginiň dizaýny Sian şäherindäki meşhur terrakota goşunyndan – b.e. öňki 210-209-njy ýyllarda ýasalan hytaý esgerleriniň we olaryň atlarynyň müňlerçe heýkelinden ylham alýar. Gurluşyk wagtynda ýerli ussalar bilen bilelikde 100 müňden gowrak keramiki plitalar taýýarlanypdyr. Dizaýnda Hytaýyň ybadathanalarynyň däp bolan üçeklerini ýada salýan aýratynlyklar hem göz öňünde tutulypdyr.
Taslamanyň düzüminde seýilgähden başga-da, ýaşaýyş jaýlary, söwda merkezleri, açyk meýdançalar, ofisler, myhmanhanalar, şeýle-de köp sanly ýanaşyk seýilgähler we pyýada ýodajyklary bar.
