Türkmenistanda «Mahabatyň esaslary» atly täze okuw kitaby neşir edildi. Onda mahabat syýasatynyň düýp manysy, onuň aýratynlyklary hem-de guralyşy bilen baglanyşykly maglumatlar beýan edilýär. Bu barada Türkmenistanyň Bilim ministrliginiň saýtynda habar berilýär.
Okuw kitabyny Magtymguly adyndaky Türkmen döwlet uniwersitetiniň žurnalistika kafedrasynyň uly mugallymy, Türkmenistanyň at gazanan žurnalisti Agamyrat Mämmedow taýýarlady. Türkmen döwlet neşirýaty tarapyndan neşir edilen bu okuw kitabynda mahabatyň ähmiýetine, onuň görnüşlerine we serişdelerine häsiýetnama berilýär.
Žurnalistika hünäri boýunça okatmagyň halkara tejribesine, Internet maglumatlaryna, şeýle hem, türkmen awtorlarynyň ylmy işlerine esaslanylyp taýýarlanylan bu okuw kitaby arkaly talyplar KHBS-iň bu ugurlardaky işi döwrebap, oýlanyşykly alyp barmak başarnygyny kemala getirmäge gönükdirilen bilimleri alarlar.
