Beýik Britaniýanyň kazyýeti Nýuport şäheriniň ýaşaýjysy Jeýms Hauellsiň 8000 bitkoin saklaýan gaty diskini tapmak üçin zibil dökülýän meýdany gazmaga rugsat sorap ýazan arzasyny ret etdi. Häzirki wagtda bitkoinleriň bahasy 750 million dollardan geçýär diýip, BBC habar berýär.
39 ýaşly Hauells 2009-njy ýylda 8000 töweregi bitkoini ýygnap, gaty diskde saklandygyny aýtdy. Bir gün içi diskli kompýuteriniň üstüne gazly suw döküp, ol ony sökýär. Käbir bölek şaýlaryny satýar, ýöne gaty diski stolunyň çekmesine salyp goýýar we ol şol ýerde birnäçe ýyllap ýatýar. 2013-nji ýylda aýaly ony tötänden zibile atýar. Biraz soň kriptowalýutanyň bahasy diýseň çalt galyp başlaýar, Hauellsiň bitkoinleri ýadyna düşýär we diski ýitirendigine göz ýetirýär.
Şol wagt bitkoinleriň jemi bahasy 7,5 million dollardy, häzirki wagtda olaryň bahasy 750 milliondan geçýär.
11 ýyldan gowrak wagt bäri Hauells şäheriň ýolbaşçylaryndan zibil dökülýän meýdanda gazuw-agtaryş işlerini geçirmäge rugsat berilmegini haýyş edip gelýär, ýöne her gezek onuň haýyşy ret edilýär. Şäheriň ýolbaşçylary diskiň zibil dökülýän meýdanyň emlägine öwrülendigini we gazuw-agtaryş işleriniň bolsa daşky gurşawy goramagyň düzgünleri boýunça gadagandygyny aýdýarlar.
Üstesine, şäher geňeşi Hauellsiň gözlegi şowly bolsa, bitkoinleri satmakdan alan girdejisiniň 10%-ini bermegi teklip edip, "geňeşe para bermäge” synanyşandygyny mälim etdi.
2013-nji ýylyň awgust-noýabr aýlary aralygynda zyňylan zibilleriň meýdanyň haýsy böleginde ýatandygy mälimdir. The Times-yň berýän maglumatlaryna görä, gaty disk Cell 2 atlandyrylýan 15 000 tonnalyk bölümde ýatyr.
Kazyýetiň karary Hauellsiň lapyny keç etdi. “Bu karar meni hiç zatsyz goýdy. Indi mende hiç zat galmady. <…> Meni açgöz hasaplamaň, men girdejimi paýlaşmaga taýyn ahyry" – diýip, BBC Hauellsiň sözlerini getirýär.
2024-nji ýylyň ahyrynda Donald Tramp ABŞ-nyň prezidenti saýlanandan soň bitkoiniň bahasy birden gymmatlap başlady. Saýlawyň öňýanyndaky kampaniýa wagtynda ol bu pudagy düzgünleşdirjekdigini, bitkoiniň hökümet ätiýaçlyklaryny döretjekdigini we ABŞ-ny “dünýäniň kriptowalýuta paýtagty” etjekdigini aýdypdy. 5-nji dekabrda bitkoiniň bahasy ilkinji gezek 100 000 dollardan geçdi.
