Microsoft Google we Amazon bilen bäsdeşligini güýçlendirip, iki ýylda Hindistanda emeli aňyň (AI) ösüşine 3 milliard dollar maýa goýar. Korporasiýa demir ýol ulaglary, saglygy goraýyş, maliýe hyzmatlary, önümçilik we bilim pudaklarynda işleýän bäş sany iri gurama bilen şertnama baglaşdy. Bu barada TechCrunch çeşmesi habar berdi.
Hususan-da, Microsoft-yň baş direktory Satýa Nadella IndiaAI Mission Datasets platformasynyň üstünde işlemek boýunça Hindistanyň Elektronika we maglumat tehnologiýalary ministrligi bilen hyzmatdaşlyk etjekdigini mälim etdi. Kompaniýa maglumatlary ýygnamakda we sintetiki maglumatlary öndürmekde kömek eder.
Şeýle hem Microsoft 2026-njy ýyla çenli 500 000 adama AI tehnologiýalaryny öwretmegi we AI Catalysts öňdebaryjy terjibe merkezini açmagy meýilleşdirýär. Bu merkez oba ýerlerinde innowasiýalary ösdürmäge we 20 hünär institutynda barlaghanalary döretmäge ýardam eder.
Hindistanyň döwlet RailTel kompaniýasy bu kompaniýa bilen demir ýol ulgamynda bulut tehnologiýasyny we AI-ni ornaşdyrmak üçin bäş ýyllyk şertnama baglaşdy. Apollo Hospitals lukmançylyk boýunça AI kömekçilerini ösdürýär we Hindistanyň Bajaj Finance iri bank däl maliýe kompaniýasy Microsoft-yň AI ulgamlarynyň kömegi bilen her ýylda 18 million dollar tygşytlamaga umyt baglaýar. Upgrad bilim başlangyjy korporatiw AI çözgütlerini işläp taýýarlamak üçin Microsoft bilen hyzmatdaşlyk edýär.
