2024-nji ýylda Beýik Britaniýada aýdym-saz satuwyndan alnan girdeji 2,4 mlrd funt sterling bolup, rekorda ýetdi. Bu barada Sanly güýmenjeler we bölek söwda assosiasiýasynyň (ERA) maglumatlaryna salgylanyp, Bi-bi-si habar berýär.
Bu görkeziji 2001-nji ýylda ykjam diskleriň meşhurlygynyň iň ýokary derejesinde hasaba alnan öňki rekorddan 200 mln funt köpdür.
Satuwyň esasy paýy Spotify, Apple Music we Amazon Music ýaly akym hyzmatlaryna ýazylmakdan gelýär – olar girdejiniň tas 85%-ini emele getirýär. Winil plastinkalaryň satuwy hem 10,5% ösüş görkezip, 6,7 mln birlige ýetdi.
Ýylyň iň köp satylan albomy Teýlor Swiftiň “The Tortured Poets Department” albomy boldy, ol tas 784 müň nusga tiraž bilen satyldy. Şeýle-de, ilkinji onluga The Weeknd-iň, Sabrina Karpenteriň, Noa Kaanyň, Billi Aýlişiň, Çappell Ronuň, Fleetwood Mac-yň, Charli XCX-iň, Coldplay-iň we Oliwiýa Rodrigonyň albomlary girdi.
Hünärmenler Beýik Britaniýanyň aýdym-saz pudagynyň internet ogurlygy we akym platformalary sebäpli ýüze çykan çökgünlikden soň ahyry “özüne gelendigini” belleýär. Şol bir wagtyň özünde girdejileriň häzirem 2001-nji ýyldaky derejesine ýetmeýändigini bellemek gerek. Şol ýyl inflýasiýany göz öňünde tutmak bilen, pudak häzirki 4 mlrd funt sterlinge deň mukdary gazandy, aýdymçy Daýdonyň albomy bolsa 1,9 mln nusgada satyldy.
