Fransiýanyň Withings kompaniýasy Las-Wegasdaky CES 2025 sergisinde Omnia akylly aýnasyny görkezdi. Täze önüm saglyk görkezijilerini anyklamak we organizmi gowy ýagdaýda saklamak üçin özboluşly bir toplumdyr diýip, The Verge habar berýär.
Omnia bedeni 360 gradus skaner edip, agramy ölçäp, ýüregiň we öýkeniň, madda alyş-çalşygynyň ýagdaýyny seljerip, bedeniň düzümini we başga-da köp zatlary kesgitläp bilýär. Şeýle-de, aýna akylly sagatlar, tonometrler ýa-da hatda akylly krowat ýaly beýleki trekerlerden maglumatlary ýygnaýar. Enjama gurnalan emeli aň alnan maglumatlary seljerýär we iýmitlenme, fiziki işjeňlik we özüňe ideg etmek boýunça maslahatlary berýär.
Mundan başga-da, aýna hakyky lukmanlar bilen aragatnaşyk saklap, olara maslahatlaşmak üçin zerur maglumatlary iberip bilýär.
Haýran galdyryjy mümkinçiliklerine garamazdan, Omnia häzirlikçe diňe konsept bolup galýar. Kompaniýa satuwyň başlajak möhletini aýtmady we hatda önümçilige goýbermek meýilnamasyny yglan etmedi.
Muňa garamazdan, konsepsiýanyň internet arkaly wideo jaň etmek, sesi eşitdirmek, ýürek ýygrylmalarynyň ýygylygyny ölçemek, EKG düşürmek, bedeniň düzümini (ýag/suw/myşsa) kesgitlemek mümkinçilikleri ýaly ösen tehnologiýalary özünde jemländigini bellemek gerek.
