Iň abraýly söweş promouşeni bolan UFC-niň prezidenti Dana Uaýt Meta korporasiýasynyň müdirler geňeşiniň agzasy boldy. Bu barada korporasiýanyň esaslandyryjysy we ýolbaşçysy Mark Sukerberg Facebook sahypasynda habar berdi.
“Dana Uaýt UFC-ni dünýäniň iň çalt ösýän we iň meşhur sport kompaniýalarynyň birine öwürdi” – diýip, Sukerberg belledi we Uaýta telekeçi hökmünde haýran galýandygyny sözüniň üstüne goşdy.
Bloomberg 55 ýaşly Uaýtyň 20-nji ýanwarda wezipä girişjek ABŞ-nyň saýlanan Prezidenti Donald Trampyň ýakyn egindeşleriniň biridigini belleýär. Mundan öň Meta Trampyň kasam kabul ediş dabarasyna 1 mln dollar bagyş etdi.
Uaýtdan başga-da, Meta-nyň müdirler geňeşine maýadar, Meta-nyň konsultatiw toparynyň agzasy Çarli Songherst, şeýle-de Exor holdinginiň baş müdiri we Stellantis-iň hem Ferrari-niň müdirler geňeşiniň ýolbaşçysy Jon Elkann girdi.
Sukerberg müdirler geňeşiniň täze agzalarynyň kompaniýanyň emeli aň, gajetler we sosial ulgamlar ýaly ugurlarda maksatlara ýetmegine kömek etjekdigini belledi.
Şeýle-de, ol Meta-nyň sosial ulgamlardaky kontentleri dolandyrmak syýasatyna we kontentleri süzmek işine täzeden garamak meýilnamalaryny yglan etdi. Hususan-da, kompaniýa garaşsyz faktçekerleriň hyzmatyndan ýüz öwrer. Mundan başga-da, Meta Facebook-yň, Instagram-yň we Threads-yň algoritmiki lentalaryna syýasy kontentleri gaýtaryp getirer.
Sukerberg bu ädimleri sosial ulgamlarda senzuranyň az bolan wagtyna dolanmagyň zerurlygy bilen düşündirýär, ýöne The Wall Street Journal, The New York Times we The Guardian ýaly uly köpçülikleýin habar beriş serişdeleri muny ABŞ-nyň saýlanan Prezidentiniň administrasiýasy bilen ýakynlaşmak üçin ýene bir synanyşyk hökmünde görýär.
