7-nji ýanwarda Belarus Respublikasynyň Türkmenistanda wezipä täze bellenen ilçisi Stanislaw Çepurnoý Prezident Serdar Berdimuhamedowa ynanç hatyny gowşurdy. Bu barada “Watan” habarlar gepleşiginde habar berildi.
Serdar Berdimuhamedow Stanislaw Çepurnoýy jogapkärli diplomatik wezipä bellenilmegi bilen gutlady. Belarusyň doly ygtyýarly wekiliniň wezipesini ýerine ýetirýän döwründe ikitaraplaýyn netijeli hyzmatdaşlygy pugtalandyrmaga hemmetaraplaýyn ýardam etjekdigine ynam bildirip, döwlet Baştutany oňa işinde üstünlikleri arzuw etdi.
Duşuşygyň dowamynda türkmen-belarus gatnaşyklarynyň häzirki ýagdaýy we geljegi barada gyzyklanma bildirilip pikir alşyldy.
Bellenilişi ýaly, döwletara ynsanperwer gatnaşyklara uly ähmiýet berilýär. Türkmenistanyň hem-de Belarus Respublikasynyň ylym-bilim, sport, medeniýet we sungat ulgamlaryndaky ysnyşykly hyzmatdaşlygy iki ýurduň we halklaryň arasyndaky dostlukly gatnaşyklary pugtalandyrmaga ýardam edýär.
Diplomat iki dostlukly ýurduň we halklaryň bähbidine hyzmatdaşlygy ösdürmek üçin ähli tagallalary etjekdigine ynandyrdy.
