Hytaýyň Chang Guang Sputnik Tehnologiýasy kompaniýasy emeli hemradan Ýere maglumat geçiriş tizliginde täze rekord goýdy. Kompaniýa ilkinji bolup tizlikde 100 Gbit/s görkezijä ýetdi, bu Ilon Maskyň Starlink ulgamynyň mümkinçiliklerinden has ýokarydyr diýip, South China Morning Post habar berýär.
Kompaniýa öňki rekordyny on esse artdyrmagy başardy.
Synag Jilin-1 toparynyň hemralarynyň biri we ýük awtoulagyna oturdylan Ýerdäki göçme stansiýa bilen geçirildi. Stansiýanyň göçme hereketi, durnukly aragatnaşyk üçin amatly howa şertleri bolan ýerleri saýlamaga mümkinçilik berýär.
“Starlink-de hemra ara aragatnaşygyň lazer ulgamy bar, ýöne olar entek hemra-Ýer lazer aragatnaşygy ýaýbaňlandyrmady. Olarda şeýle tehnologiýanyň bolmagy mümkin diýip çaklaýarys, ýöne biz eýýäm giň gerimli enjamlaşdyryş işine başladyk" - diýip, kompaniýanyň ýerdäki stansiýalaryň lazer aragatnaşygy tehnologiýasy boýunça ýolbaşçysy wan Hanhan mälim etdi.
Ýetilen tizlik bir sekuntda ýokary durulykdaky 10 sany doly göwrümli filmi geçirmäge mümkinçilik berýär. Alymlar atmosfera päsgelçiliginiň öwezini dolmak we lazeri takyk gönükdirmek ýaly çylşyrymly tehniki meseleleri çözmeli boldular.
Chang Guang Satellite Technology 2027-nji ýyla çenli Jilin-1-iň 300 hemrasynyň hemmesini lazer aragatnaşyk ulgamy bilen enjamlaşdyrmagy meýilleşdirýär. Bu ugurda işläp taýýarlaýyşlar ABŞ-da we Fransiýada-da dowam edýär. Mysal üçin, NASA-nyň TBIRD ulgamy 2023-nji ýylda 200 Gb / s tizlige ýetdi.
