“Pari Sen-Žermen” final oýnunda “Monakony” utup, Fransiýanyň Superkubogynyň eýesi boldy. Oýun ýekşenbe güni Dohada (Katar) geçirildi we Pariž klubunyň peýdasyna 1:0 hasabynda tamamlandy.
Oýnuň esasy wagtyna goşulan soňky minutlarda ýeke-täk goly “PSŽ-niň” wingeri Usman Dembele geçirdi (90+2).
Bu parižliler üçin yzygider üçünji we olaryň taryhynda 13-nji kubok boldy. “PSŽ” Superkubogy fransuz klublarynyň ählisinden köp gazandy. Ikinji orny eýeleýän “Olimpik Lion” 8 gezek ýeňiji boldy.
“Monako” üçin bu ýeňliş Fransiýanyň Superkubogy üçin oýunlarda dördünji boldy. Ol tituly dört gezek gazanypdy, soňky gezek 2000-nji ýylda aldy.
Ilkibaşda oýny 2024-nji ýylyň 8-nji awgustynda Pekinde geçirmek meýilleşdirilipdi, ýöne oýun yza süýşürildi.
