WhatCar neşiri ulanylan iň ygtybarly awtomobilleriň sanawyny hödürledi. Reýting tas 30 müň awtoulag eýesinden pikir soraşmalaryň esasynda düzüldi.
Sanawda birinji orny öz eýelerini seýrek kyn ýagdaýa düşürýän ykjam Audi A3 sedany eýeledi. Pikir soraşmalara görä, Audi A3-üň ýekeje eýesi-de haýsydyr bir näsazlyklar ýa-da awtomobiliň döwülmegi bilen ýüze-ýüz bolmandyr. Neşir modeliň benzin görnüşlerinden 1,5 litrlik 148 at güýji bolan hereketlendirijili wersiýasyna, dizel hereketlendirijileriň tarapdarlaryna bolsa 148 at güýji bolan 2,0 litrlik dizel hereketlendirijili wersiýasyna üns bermegi maslahat berýär.
Ikinji orunda dizel hereketlendirijisi bolan Kia Sportage koreý krossoweri ýerleşdi. Gohly hereketlendirijisine we esasy komplektasiýada döwrebap funksiýalaryň birnäçesiniň ýokdugyna garamazdan, awtomobil eýeleri ony giň salony we tygşytlylygy üçin saýlaýarlar.
Üçünji orny 99,6% ygtybarlylyk görkezijisi bilen öňki nesil Lexus NX ýapon krossoweri eýeledi. Awtomobil eýeleriniň diňe 2%-i näsazlyklar bilen ýüzbe-ýüz boldy.
Şeýle-de, bäşlige 99,1% ygtybarlylyk görkezijisi bilen Mercedes-Benz SL we tygşytlylyk hem-de premium komplektasiýa bilen tapawutlanýan ykjam gibrid hetçbegi Lexus CT girdi.
Galan bäş model şeýle yzygiderlilikde ýerleşdi: Lexus RX (2009-2016), Honda Civic (benzin wersiýasy), Lexus RX (2016-2022), Mazda CX-5 we Toyota Auris.
