BMG-niň Baş Assambleýasy kiber jenaýatçylyk baradaky kanuny taýdan ilkinji konwensiýany kabul etdi. Bu resminama soňky 20 ýylda kiber howplara garşy göreşde ilkinji global hukuk guralyna öwrüldi diýip, guramanyň web sahypasyna salgylanýan RBC habar berýär.
BMG-niň Neşe serişdeleri we jenaýatçylyk boýunça müdirliginiň ýerine ýetiriji direktory Gada Waliniň sözlerine görä, şeýle şertnamanyň zerurlygy sanly gurşawda jenaýatlaryň sanynyň köpelmegi bilen baglanyşyklydyr. Bütindünýä bankynyň berýän maglumatlaryna görä, 2023-nji ýylda dünýäniň ilatynyň 67,4%-i internetden peýdalanyp, hakerler üçin täze mümkinçilikler döretdi. Olar tehnologiýany maglumatlary, maliýe serişdelerini ogurlamak, şeýle hem adam we ýarag söwdasy üçin ulanýarlar.
Konwensiýa derňewleri we ekstradisiýalary çaltlaşdyrmak, jenaýatdan gelýän girdejileri aýyrmak we serişdeleri gaýtaryp almak üçin amaly kömek torunyň döredilmegini göz öňünde tutýar. Çagalary internetdäki zorluklardan goramaga aýratyn üns berilýär.
Şeýle hem bu resminama ýurtlara kiber jenaýatçylaryň pidasy bolanlaryň çeken zyýanynyň öwezini doluş we dikeldiş maksatnamalaryny işläp düzmäge borçlandyrýar.
