24-nji dekabrda Belarusyň Türkmenistandaky ilçisi Wýaçeslaw Beskosty Türkmenistanyň daşary işler ministriniň orunbasary Ahmet Gurbanow bilen duşuşdy. Diplomat Türkmenistandaky wezipesini tamamlaýar diýip, türkmen daşary syýasat edarasynyň saýtynda habar berilýär.
Duşuşygyň dowamynda syýasy-diplomatik, söwda-ykdysady we medeni-ynsanperwer ugurlarda hyzmatdaşlygy ösdürmegiň wajyp meseleleri we geljegi ara alnyp maslahatlaşyldy.
Diplomatlar halkara we sebit gurluşlarynyň çäginde Türkmenistan bilen Belarusyň arasyndaky konstruktiw gatnaşyklaryň dowam etdirilmeginiň möhümdigini kanagatlanma bilen bellediler.
Şeýle hem ilçi Wýaçeslaw Beskostynyň türkmen-belarus gatnaşyklarynyň ösmeginde şahsy goşandy nygtaldy.
Türkmenistanyň daşary işler ministriniň orunbasary diplomatyň işinde täze üstünlikleri arzuw etdi.
