23-nji dekabrda Aşgabatda «Ýyldyz» otelinde “Türkmenistanda dümewiň pandemiýasyna taýýarlyk mehanizmini durmuşa geçirmek" boýunça milli maslahat geçirildi. Duşuşyk Bütindünýä saglygy goraýyş guramasynyň Türkmenistandaky wekilhanasy tarapyndan gurnaldy.
Duşuşyga Türkmenistanyň Oba hojalygy, Saglygy goraýyş we derman senagaty ministrlikleriniň, Döwlet weterinariýa gullugynyň, Aşgabat, Arkadag şäherleriniň, şeýle hem ýurdumyzyň sebitleriniň Döwlet arassaçylyk we keselleriň ýaýramagyna garşy göreş gullugynyň wekilleri gatnaşdylar.
Türkmenistanyň Oba hojalygy ministrliginiň ýanyndaky Döwlet weterinariýa gullugynyň Halkara we ylmy aragatnaşyklar bölüminiň başlygy Arslan Soltanmyradow maslahatda eden çykyşynda weterinariýa pudagynda asudalygy üpjün etmegiň esasy guraly hökmünde epidemiologiki we laboratoriýa gözegçiligini güýçlendirmegiň möhümdigini belläp, ýokanç keselleriň öňüni almak we gözegçilikde saklamak üçin ösen öňdebaryjy tehnologiýalaryň ulanmagyň, ylmy çemeleşmeleri gowulandyrmagyň we pudagara hyzmatdaşlygy güýçlendirmegiň möhümdigini belläp geçdi.
Milli maslahatyň maksady dümew pandemiýasy, epidemiologiki we wirus gözegçiligi we Türkmenistanda ýokanç keselleriň ýaýramagyna garşy taýýarlyk gurallarynyň taslamasynyň gidişini ara alyp maslahatlaşmak boldy.
