Köpden bäri garaşylýan “28 ýyl soň” (28 лет спустя) filminiň treýleri ähli wideo hostinglerde hakyky hit boldy. Wideo ilkinji günde 60 mln tomaşa ýygnap, horror žanryndaky filmleriň taryhynda iň meşhur ikinji treýler boldy diýip, Deadline habar berýär.
Birinji orny henizem ilkinji 24 sagatda 96 mln gezek görlen “Ol 2” (Оно 2) filminiň treýleri saklaýar.
Denni Boýluň täze filminiň sýužeti ölýän ejesine kömek etmek üçin lukman gözleýän ýaş adam barada gürrüň berýär. Täze treýlerde zombi bilen Aaron Teýlor-Jonson we Reýf Faýns göreşýär. Sýužet “28 gün soň” filminiň wakalaryndan 28 ýyl soň ýaýbaňlanýar. Geljekki film franşizanyň üçünji bölümi bolar.
Birinji filmde baş keşbi Killian Mýorfi ýerine ýetirdi: onuň gahrymany Jim komadan oýanyp, tutuş dünýäni wirusyň gurşap alandygyny bilýär. 2002-nji ýylyň filmi zombi-apokalipsis žanrynyň nusgawy lentasy boldy we 8 mln dollar býujet bilen prokatda 84 mln dollar gazandy.
2007-nji ýylda Huan Karlos Fresnadilýonyň režissýorlygynda onuň dowamy “28 hepde soň” çykdy. Asyl filmiň ssenarisiniň awtorlary Denni Boýl we Aleks Garlend edil Mýorfi ýaly ikinji bölümiň üstündäki işlere gatnaşmady. Ýöne olar täze taslamada işiň başyna gaýdyp geldi.
“28 ýyl soň” doly iPhone 15 Pro Max smartfonynda düşürildi. Filmiň global premýerasy 2025-nji ýylyň 20-nji iýunynda bolar.
