24-nji dekabrda NASA-nyň “Parker” kosmos enjamy kosmos uçuşlarynyň taryhynda Güne rekord derejede ýakynlaşar diýip, Space.com habar berýär.
Zond Günüň daşky täjini öwrenmek üçin niýetlenendir. Ol sagatda 690 müň kilometr tizlik bilen ýyldyzyň üstünden bary-ýogy 6,1 million kilometr aralykdan uçup geçer.
Bu taryhy hereketden öň alymlar “Parkerden” taýýardygy barada signal kabul etmeli. Eger missiýa üstünlikli bolsa, NASA zonduň kömegi bilen alnan ilkinji suratlary 2025-nji ýylyň başynda hödürläp biler.
“Biz taryha girmäge taýynlyk görýäris. “Parker” zondy ýyldyzymyz bilen baglanyşykly täze hakykata gözümizi açýar. Enjam tarapyndan iberilen maglumatlary gaýtadan işlemek üçin onlarça ýyl gerek bolar” – diýip, taslamanyň ýolbaşçysy Nur Rawafi aýtdy.
Kiçiräk awtomobiliň ululygyndaky kosmos enjamy 2024-nji ýylyň noýabr aýynda Weneranyň töweregine soňky aýlawyny tamamlap, Güne tarap ugrady. “Parker” plazma akymyndan geçip, “inýän tolkunyň astyndan ýüzýän sýorfer ýaly” Gün zyňyndylarynyň sebitinden hem uçup geçer diýlip meýilleşdirilýär.
