Daşary ýurt dillerini öwrediji Duolingo ykjam goşundysy we Netflix akym hyzmaty “Kalmar oýnunyň” ikinji möwsüminiň premýerasyna bagyşlanan bilelikdäki taslamany işe girizdiler.
Duolingo ulanyjylary üçin koreý diliniň sapaklarynda serialdan 40-dan gowrak esasy söz we “Hiç kime ynanma”, “Sen çykdyň” ýaly jümleler, şeýle-de “dalgona” – birinji möwsümiň üçünji bölüminden koreý süýjüliginiň ady peýda boldy.
Hyzmat serialyň iň belli pursatlaryna aralaşmak arkaly dile düşünmegi çuňlaşdyrmaga çalyşýar. Kompaniýalaryň hyzmatdaşlyk etmegine 2021-nji ýylda birinji möwsüm çykandan soň koreý dilini öwrenýänleriň sanynyň 40% artmagy itergi berdi. Belläp geçsek, goşundyda koreý okuwy diňe iňlis dilinde elýeterlidir.
Mundan başga-da, TikTok-da “Gyzyl çyra, ýaşyl çyra” stilinde filtr peýda boldy we bu ýerde ulanyjylar goşundynyň tumary – gözegçiniň gülgüne kostýumyny geçen baýguş Duonyň gatnaşmagynda ses ýumuşlaryny ýerine ýetirýärler. Ýalňyş bolan ýagdaýynda baýguş oýunçylary ýok edýär.
Şeýle-de, Netflix muşdaklar üçin çäreleri gurnar. Los-Anjelesde ýaryş geçirilip, onuň ýeňijileri ABŞ-daky premýera üçin petek alar. Premýera režissýor Hwan Don-hýok we aktýorlar, şol sanda baş keşbi ýerine ýetiriji Li Jon-je gatnaşar.
Beýleki şäherlerde (Nýu-Ýork, Madrid, Seul we Sidneý) muşdaklar “Squid Game: The Experience” interaktiw oýunlaryna gatnaşmaga mümkinçilik alar. Mundan başga-da, 17-nji dekabrda Netflix Games tarapyndan işlenip düzülen “Squid Game: Unleashed” ykjam oýny çykar.
Serialyň ikinji möwsüminiň premýerasy 26-njy dekabrda geçiriler.
