Telekommunikasiýalar we informatika institutynda Halkara Bitaraplyk güni hem-de ýetip gelýän Täze – 2025-nji ýyl baýramyna bagyşlanylyp, Türkmenistanyň talypynyň gatnaşmagynda Açyk breýn-ringi geçirildi. Bäsleşigiň netijeleri boýunça Türkmen döwlet ykdysadyýet we dolandyryş institutynyň topary bäsleşikde birinji orun eýeledi diýip, "Türkmenistan: Altyn asyr" elektron neşiri habar berýär.
Intellektual bäsleşikde ýurdumyzyň ýokary okuw mekdepleriniň 15-siniň 100-e golaý talyplary duşuşdylar. Her ýokary okuw mekdepden düzüminde 6 talyp bolan 1 topar gatnaşdy. Degişlilikde, bäsleşige 15 topar gatnaşdy.
Akyl-paýhas bäsleşiginiň dowamynda gatnaşyjylar üçin Türkmenistanyň Bitaraplygyna, onuň döwletdäki hem-de onuň çäklerinden daşardaky ähmiýetine we eýeleýän ornuna hem-de Täze ýyly baýram etmegiň taryhyna we däplerine degişli dürli gyzykly sowallar berildi.
Akyl-paýhas bäsleşiginiň düzgünleri boýunça pikirlenip ara alyp maslahatlaşmak we jogap bermek üçin toparlara 1 minut wagt berildi. Şoňa görä-de, gatnaşyjylar biri-birinden öňürtmek üçin alyp baryjynyň sowallaryna örän tiz jogap bermäge çalyşdylar.
Eminler ikinji orny Döwletmämmet Azady adyndaky Türkmen milli dünýä dilleri institutynyň we Magtymguly adyndaky Türkmen döwlet uniwersitetiniň toparlaryna berdiler.
Türkmenistanyň Döwlet energetika institutynyň hem-de Myrat Garryýew adyndaky Türkmenistanyň Döwlet lukmançylyk uniwersitetiniň talyplary üçünji orny paýlaşdylar.
Çäräniň ahyrynda ýokary okuw mekdepde ýeňijiler sylaglanylyp, olara Türkmenistanyň Telekommunikasiýalar we informatika institutynyň diplomlary hem-de bäsleşigiň hemaýatkärlerinden sowgatlar gowşuryldy.
