"Xiaomi" kompaniýasy "SU7 Ultra" elektrik awtoulagynyň eýelerini taýýarlamak üçin naýbaşy sürüjilik mekdebiniň açylandygyny habar berdi. Täze önüm indiki ýylyň mart aýynda satuwa çykarylar diýip, ITHome ýazýar.
Bu awtomekdep 1,545 at güýjüne eýe bolan elektrik hereketlendiriji bilen enjamlaşdyrylan awtoulagy alyjylara, şeýle uly güýçli ulagy satyn almazdan ozal nähili dolandyrmalydygyny öwrederler. Öňünden sargyt beren müşderiler bu sürüjilik mekdebine gatnap bilerler diýip, kompaniýanyň esaslandyryjysy Leý Szýun aýtdy.
"SU7 Ultra" üç sany elektrik hereketlendirijisi bilen işleýär: onuň öňki tekerleri V6 birlik (391 at güýji), yzky tekerleri iki sany V8 birlik (hersi 577 at güýji) bilen hereketlenýär. Bu ýokary dinamikany üpjün edýär we sürüjilerden ýörite taýýarlygy talap edýär.
Okuwlara ýazylmak ýakyn wagtda başlanar. Sürüjilik mekdebini okuwa taýýarlamak, şol sanda degişli işgärleri işe almak dekabr aýynyň ahyryna çenli tamamlanar.
Awtoulag üçin öňünden sargyt eýýäm açykdyr, onuň bahasy 112,200 dollar. Leý Szýunyň pikiriçe, çykarylýança galan aýlar "SU7 Ultra-nyň" hilini gowulandyrmak üçin ulanylar diýip, ixbt.com ýazýar.
