OpenAI täze önümleriň 12 günlük marafonynyň dowamynda täze işläp taýýarlamalary: ýazylyşyk boýunça elýeterli bolan Sora Turbo wideo döredijisini, kompaniýanyň ähli emeli aň modellerine çäksiz elýeterlilik bilen ChatGPT Pro premium nyrhnamasyny, şol sanda o1 modeliniň kämilleşdirilen o1 pro wersiýasyny anons etdi.
Sora Turbo modeli tekst beýanynyň esasynda wideo döretmek üçin niýetlenendir. Ulanyjylar 5 – 20 sekuntlyk we 1080p durulykda wideo döredip biler. Baha wideonyň hiline baglylykda “kreditlerde” hasaplanylýar. Mysal üçin, 480p wideonyň bahasy 20 – 150 kredite, 1080p – 2000 kredite barabar.
ChatGPT Plus ulanyjylary üçin (aýda 20 dollar) aýda 1000 kredit göz öňünde tutulan, täze ChatGPT Pro nyrhnamasy (200 dollar) bolsa 10 000 kredit we belliksiz wideo döretmek mümkinçiligini berýär.
Şol bir wagtyň özünde, OpenAI çylşyrymly hasaplamalar we logiki meseleler üçin kämilleşdirilen o1 pro modelini anons etdi. Kompaniýanyň wekili Jeýson Weýiň aýtmagyna görä, bu modele ýazylmak emeli aňdan işjeň peýdalanýan tejribeli ulanyjylara gönükdirilendir.
“Biz ChatGPT Pro-nyň auditoriýasynyň ChatGPT-niň tejribeli ulanyjylary – modelleri eýýäm matematika, programmirleme we ýazuw ýaly meselelerde öz mümkinçilikleriniň aňrybaşyna ýetirip bilýänler bolar diýip hasaplaýarys” – diýip, OpenAI-iň tehniki işgäri Jeýson Weý belledi.
Garaşsyz bilermenleriň hasaplamalaryna görä, o1 pro, esasanam, maglumatlar bilen işlemek, programmirleme ýaly ugurlarda has takyk we gutarnykly jogap berýär. Neýroulgam matematikada, ylymda we kodlamakda çylşyrymly meselelerden gowy baş çykarýar.
Pro nyrhnamasy Advanced Voice Mode ses funksiýasyny we GPT-4o üçin çäksiz elýeterliligi-de öz içine alýar.
OpenAI käbir ýazylyşyklary mugt paýlamakçy. Kompaniýa “öňdebaryjy edaralarda” lukmançylyk gözlegçilerine 10 sany ChatGPT Pro grantyny bermek boýunça programmany, şeýle-de geljekde “dürli ugurlar” boýunça goşmaça grantlary bermek meýilnamalaryny yglan etdi.
