Zalsburgdaky (Awstriýa) Salzburg Schokolade fabrikasy belli “Mosart” süýjüleriniň (Mirabell Mozartkugeln) önümçiligini tamamlady. Önümçilik maliýe meseleleri sebäpli ýapyldy. Bu süýjüleriň soňky toplumy dekabr aýynda çykaryldy diýip, DerStandard neşiri habar berýär.
Kärhanany ýapmak çözgüdi Mirabell brendine eýeçilik edýän Mondelez amerikan kompaniýasy tarapyndan kabul edildi. Önümçilik daşary ýurda geçiriler, ýöne anyk ýer barada häzirlikçe maglumat ýok.
Salzburg Schokolade heniz 2021-nji ýylda batandygy barada arza berdi. Çökgünligiň esasy sebäbi koronawirus pandemiýasy we ýadygärlik süýjülerine bolan islegiň pese gaçmagyna getiren syýahatçylyk akymynyň azalmagy boldy. Şol wagt kompaniýanyň bergisi 27 mln ýewrodan geçýärdi.
2022-nji ýylda fabrikanyň aktiwlerini Rumyniýanyň KEX Confectionery topary satyn aldy, ýöne oňa ýagdaýy durnuklaşdyrmak başartmady we şol ýylyň dekabr aýynda önümçilik hem işgärleriň bir bölegi azaldyldy.
Salzburg Schokolade 1897-nji ýyldan bäri işledi. Özboluşly süýjüleriň taýýarlanyş usulyny 1890-njy ýylda ýerli konditer Paul Fýurst döretdi. Süýjüler Zalsburgda doglan kompozitor Wolfgang Amadeý Mosartyň hormatyna atlandyryldy.
DerStandard Salzburg Schokolade tarapyndan öndürilen “Mosart” süýjüleriniň özboluşly önüm däldigini ýazýar. Neşiriň maglumatlaryna görä, XIX asyryň ahyrynda döredilen şol süýjüleri häzire çenli uly bolmadyk ýerli konditer fabrikasy öndürýär.
Süýjüler pissäniň, nogulyň we şokoladyň goşulmagy bilen marsipandan taýýarlanýar.
