“Maklareniň” sürüjisi britaniýaly Lando Norris “Formula-1” çempionatynyň jemleýji, 24-nji tapgyry bolan Abu-Dabiniň Gran-prisiniň ýeňijisi boldy.
Ikinji orny “Ferrariniň” sürüjisi Karlos Saýns, üçünji orny hem bu toparyň wekili Şarl Lekler eýeledi.
Şeýle-de, ilkinji onluga şular girdi: 4. Lýuis Hemilton (“Mersedes”); 5. Jorj Rassell (“Mersedes”); 6. Maks Werstappen (“Red Bull”); 7. Pýer Gasli (“Alpin”); 8. Niko Hýulkenberg (“Haas”); 9. Fernando Alonso (“Aston Martin”); 10. Oskar Piastri (“Maklaren”).
Saýns “Ferrari” üçin özüniň soňky ýaryşyny geçirdi. Ol 2025-nji ýyldan başlap “Uilýamsda” çykyş eder.
“Red Bull-yň” meksikaly sürüjisi Serhio Peres ikinji aýlawda ýaryşdan çykdy. Ol birinji aýlawda “Kik Zauberden” finlýandiýaly Waltteri Bottas bilen çaknyşdy. Öň, KHBS bu ýaryşyň Peresiň karýerasynda soňky bolup biljekdigini habar berdi. Bottas hem 32-nji aýlawdan soň ýaryşdan çykdy. Noýabr aýynda “Kik Zauber” onuň möwsümiň ahyrynda gitjekdigini mälim etdi.
Belläp geçsek, Hemilton üçin hem bu ýaryş “Mersedesiň” düzüminde soňky boldy. Ol 2025-möwsüminden “Ferrari” toparyna goşular.
Şeýlelikde, möwsümiň jemi boýunça, “Red Bull-yň” sürüjisi niderlandly Maks Werstappen “Formula-1-iň” umumy sanawynda ýeňiji we yzygider dördünji gezek çempion boldy.
Konstruktorlaryň kubogyny 1998-nji ýyldan bäri ilkinji gezek “Maklaren” utdy. Şol ýyl “Maklarene” ýeňşi britaniýaly Dewid Kulthard we finlýandiýaly Mika Hakkinen getiripdi. Topar üçin bu “Formula-1-de” dokuzynjy kubokdyr.
