2024-nji ýylda dünýäde milliarderleriň sany 2544-den 2682-ä çenli artdy, olaryň umumy baýlygy bolsa 17% ýokarlanyp, 14 trln dollar boldy. Bu barada UBS Billionaire Ambitions ýyllyk hasabatynda aýdylýar.
2015-nji ýylda hasabat çykyp başlany bäri milliarderleriň sany 50%, olaryň umumy baýlygy bolsa 121% artdy.
On ýylyň dowamynda zenan milliarderleriň sany 190-dan 344-e ýetdi, olaryň umumy kapitaly bolsa 153% ýokarlanyp, 1,7 trln dollar boldy.
Soňky ýyllarda, esasanam, tehnologiýa milliarderleriniň kapitaly çalt ösdi – 2015-nji ýyldaky 789 mlrd dollardan 2024-nji ýylda 2,4 trln dollara çenli. Olaryň yzyndan 1,3 trln dollar baýlygy bilen senagatçylar gelýär.
Dünýä kapitalynyň ösüşine uly goşant goşanlar Demirgazyk Amerikadaky milliarderler boldy. Diňe soňky ýylda olaryň baýlygy 27,6%, 6,1 trln dollara çenli ýokarlandy. Şol bir wagtyň özünde hytaýly milliarderleriň baýlygy düzgünleriň güýjemeginiň esasynda azalýar.
2024-nji ýylda milliarderleriň 70%-i baýlygyny özbaşdak gazandy, galan 30%-i kapitaly miras aldy.
