Türkmenistanyň ýokary we orta hünär okuw mekdepleriniň wekilleri Magtymguly adyndaky Türkmen döwlet uniwersitetinde Türkmen-Hindi innowasion tehnologiýalary merkeziniň binýadynda geçirilýän startap-taslamalary ösdürmek boýunça ýörite okuwlara gatnaşýarlar. Okuwlar 29-njy noýabrdan 10-njy dekabry aralygynda geçirilýär diýip, "Türkmenistan: Altyn asyr" elektron neşiri habar berýär.
«Hünär bilim edaralarynda innowasiýaly telekeçiligiň platformalaryny ösdürmek. Işewürlik-halypaçylygynyň esaslary» diýen at bilen geçirilýän okuw ýurdumyzyň ýokary we orta hünär okuw mekdepleriniň 17-siniň 30-dan gowrak mugallymlaryny hem-de işgärlerini bir ýere jemledi.
Türkmenistanyň Bilim ministrligi, milli jemgyýetçilik bileleşikleri «Türkmenistanyň Ykdysatçylar birleşmesiniň» we «Türkmenistanyň ýaşlarynyň üstünlikleri» bilen bilelikde hem-de üstünlikli işleýän «Maslahatly Çözgüt», «Startap Merkezi» we «Eksport Konsalting» ýaly işewür toparlaryň goldaw bermeginde çäräniň guramaçylary bolup çykyş edýärler.
Mälim bolşy ýaly, netijeli ösüşiň hem-de döwletleriň ykdysadyýetleriniň bäsleşige ukyplylygynyň esasy çeşmesi ähli ulgamlara innowasiýalary ornaşdyrmakdyr. Bu bolsa innowasion startap-pikirleriň we ylmy işläp taýýarlamalaryň durmuşa geçirilişiniň netijesi bolup durýar. Şolary döretmek boýunça işler startap-taslamalarda alnyp barylýar. Dünýäniň ýurtlarynda şol taslamalaryň 40 göterime golaýy bilim edaralarynda ýerleşýär.
Okuwlaryň esasy maksady ýurdumyzyň 17 sany orta hünär okuw mekdeplerinde startap-taslamalary döretmekde, şol taslamalar üçin işgärleri taýýarlamakda, şeýle hem ýaş alymlara, öz innowasion taslamalaryny iş ýüzünde amala aşyrmak isleýän startapçylar bolan pikirler bilen çykyş edýän awtorlara kömek etjek halypalary okatmakdan ybaratdyr.
