Türkiýäniň Daşary işler ministrliginiň öňki ýolbaşçysy Feridun Sinirlioglu Ýewropada Howpsuzlyk we Hyzmatdaşlyk Guramasynyň (OSCE) Baş sekretary wezipesini eýeledi. Onuň wezipä bellenmegi barada guramanyň häzirki başlygy, Maltanyň DIM-niň ýolbaşçysy Ýan Borg habar berdi diýip, TASS belleýär.
Borg öz habarynda OSCE-niň esasy wezipelerine beýleki bellemeler barada hem mälim etdi. Şeýlelikde, Demokratik institutlar we adam hukuklary boýunça býuronyň müdiri wezipesine Gresiýadan Mariýa Telalýan bellenildi. OSCE-niň milli azlyklaryň işi boýunça Ýokary komissary Niderlandlardan Kristof Kamp, guramanyň KHBS-iň azatlygy meseleleri boýunça wekili bolsa Norwegiýadan Ýan Braatu boldy.
Feridun Sinirlioglunyň Türkiýäniň BMG-niň ýanyndaky hemişelik wekili bolmak ýaly uly diplomatik tejribesi bar.
Sinirliogludan öň OSCE-niň Baş sekretary wezipesini Helga Mariýa Şmid eýeledi. Ol bu wezipäni 2020-nji ýyldan bäri üç ýylyň dowamynda eýeledi, soňra 2024-nji ýylyň sentýabryna çenli gaýtadan saýlandy.
OSCE 1973-nji ýylda esaslandyryldy. Onuň düzümine 57 döwlet girýär. Gurama Ýewropada, Merkezi Aziýada we Demirgazyk Amerikada halkara dialogy goldamakda we dawa-jenjelleri çözmekde möhüm rol oýnaýar.
