5-nji dekabrda Prezident Serdar Berdimuhamedowyň tabşyrygy boýunça Mejlisiň Başlygy D.Gulmanowa Oman Soltanlygynyň Türkmenistandaky Adatdan daşary we Doly ygtyýarly ilçisi Saif bin Raşid bin Saif Al-Jahwariden ynanç hatyny kabul etdi. Bu barada milli parlamentiň metbugat gullugy habar berýär.
Milli parlamentiň ýolbaşçysy ilçini jogapkärli wezipä bellenilmegi bilen gutlap, alyp barjak asylly işinde üstünlikleri arzuw etdi.
Duşuşygyň dowamynda diplomata Mejlisiň düzümi we onuň ýurdumyzyň hukuk binýadyny toplumlaýyn döwrebaplaşdyrmagyň çäklerinde alyp barýan köptaraply işleri barada giňişleýin gürrüň berildi.
Saif bin Raşid bin Saif Al-Jahwari öz ýurdunyň Türkmenistan bilen hyzmatdaşlygy işjeňleşdirmäge, şol sanda söwda, işewürlik we medeni gatnaşyklary ýola goýmaga gyzyklanma bildirýändigini belledi.
Duşuşygyň ahyrynda türkmen-oman hyzmatdaşlygynyň dürli ugurlarda ösdüriljekdigine ynam bildirildi. Şeýle hem ikitaraplaýyn gatnaşyklaryň berkidilmeginiň möhüm şerti bolup hyzmat edýän parlamentara gatnaşyklary giňeltmäge taýýarlyk beýan edildi.
