4-nji dekabrda Prezident Serdar Berdimuhamedow şu ýylyň ýanwar — noýabr aýlarynda harby we hukuk goraýjy edaralar tarapyndan ýerine ýetirilen işleriň jemleri boýunça Döwlet howpsuzlyk geňeşiniň nobatdaky mejlisini geçirdi diýip, TDH habar berýär.
Mejlisiň barşynda Döwlet howpsuzlyk geňeşiniň sekretary, goranmak ministri B.Gündogdyýew Watan goragçylary üçin talabalaýyk gulluk we iş şertlerini döretmek, serkerdeleriň hünär derejesini ýokarlandyrmak, çagyryş boýunça harby gullugy geçýän harby gullukçylary harby gullukdan boşatmak we Türkmenistanyň raýatlaryny harby gulluga çagyrmak boýunça görülýän çäreler barada hasabat berildi.
Baş prokuror B.Muhamedow şu ýylyň on bir aýynda ýerine ýetirilen işleriň netijeleri, ähli ulgamlarda kanunçylygyň berjaý edilmegine gözegçilik etmek babatda alnyp barylýan işler, ýurdumyzyň Ýaragly Güýçleriniň Belent Serkerdebaşysynyň tabşyrygy boýunça kanunçylyk hukuk namalarynyň düzgünleriniň ýerine ýetirilişine geçirilen barlaglaryň netijeleri barada hasabat berdi.
Mejlisiň barşynda Türkmenistanyň Prezidenti prokurorlary wezipä bellemek we wezipeden boşatmak hakynda degişli resminama gol çekdi.
Içeri işler ministri M.Hydyrow hukuk bozulmalarynyň öňüni almak, ýol howpsuzlygy düzgünleriniň, ýangyna garşy göreş düzgünleriniň berjaý edilmegini üpjün etmek boýunça ýerine ýetirilen toplumlaýyn çäreler barada hasabat berdi.
Mejlisiň dowamynda şeýle hem Ýokary kazyýetiň başlygy, milli howpsuzlyk ministri, Döwlet serhet gullugynyň başlygy, adalat ministri, Döwlet migrasiýa gullugynyň başlygy, ýolbaşçylyk edýän düzümlerinde şu ýylyň on bir aýynda ýerine ýetirilen işler barada hasabat berdiler.
Serdar Berdimuhamedow diňe goranyş häsiýetine eýe bolan Harby doktrina laýyklykda, Garaşsyz, hemişelik Bitarap döwletimiziň harby howpsuzlygyny hem-de bitewüligini ýokary derejede üpjün etmek, döwletimiziň goranmak ukybyny mundan beýläk-de berkitmek, Watan goragçylarynyň, olaryň maşgala agzalarynyň ýaşaýyş-durmuş şertlerini has-da ýokarlandyrmak boýunça yzygiderli çäreleriň durmuşa geçirilýändigini belledi.
Döwlet howpsuzlyk geňeşiniň mejlisinde başga-da birnäçe meselelere garaldy we olar boýunça degişli çözgütler kabul edildi.
