Fransiýanyň prezidenti Emmanuel Makron aýaly Brijit bilen ýangyndan soň dikeldilen Notr-Dam-de-Parini (Pariž Bibi Merýem ybadathanasy) gözden geçirdi. Bu ybadathananyň resmi açylyşy ýene bir hepdeden, 7-nji dekabrda bolar.
Dabaraly çäre bütin dünýäde göni ýaýlymda görkeziler diýip, BBC habar berýär.
Meşhur ybadathana - Fransiýanyň paýtagtynyň iň meşhur taryhy we binagärlik ýadygärliklerinden biridir. Oňa “Fransiýanyň ýüregi” diýilýär. Notr-Damda ýangyn 2019-njy ýylyň 15-nji aprelinde agşam başlandy. 500-den gowrak adam dokuz sagatdan gowrak wagtlap ýangyna garşy göreşdi.
Ýangyn binanyň üçegine agyr zeper ýetirdi. Onuň 750 tonnalyk çürelip gidýän gümmezi ýykyldy. Desganyň iň meşhur aýratynlyklaryndan biri bolan ägirt uly reňkli bägül witražlar hem zaýalandy. Witražlaryň asyl nusgalary baryp-ha XIII asyrda döredilipdi, ýöne olaryň diňe bir bölegi şu güne çenli saklanyp galypdyr, köp witražlar öňki ýangynlar wagtynda ýok edilipdir. Soňky ýangyn wagtynda näçe penjirä we nä derejede zeper ýetendigi belli däl, ýöne olar indi dikeldilenden soň öňki görnüşine eýe boldular.
Dikeldiş işleriniň bahasy ilkibaşda bir milliard ýewro, dikeldilmeli möhleti 10-15 ýyl diýlip çaklanyldy, ýöne Makron ybadathananyň bäş ýylda gaýtadan dikeldiljekdigini aýdyp, söz berdi. Häzir, ähli tehnologiki we syýasy päsgelçiliklere garamazdan, Notr-Dam açylmaga taýýar.
Netijede, dikeldiş işleri ýurda 700 million ýewro düşdi. Bu mukdaryň bir bölegini hususy maýadarlar berdiler. Bu işe 250 sany gurluşyk kompaniýasy we ýüzlerçe hünärmen gatnaşdy.
