ÝUNESKO gözleg geçirip, onuň netijesinde köp blogerleriň maglumaty ýaýratmazdan öň onuň dogrudygyny barlamaýandygyny ýüze çykardy. BMG-niň guramasy mazmun döredijileri faktçeking endiklerini ösdürmäge çagyrýar diýip, The Guardian habar berýär.
Pikir soraşma 45 ýurtdan (esasan, Ýewropadan we Aziýadan) 500 inflýuenser gatnaşdy, olaryň köpüsi 35 ýaşdan kiçidi. Soraga gatnaşanlar döwlet saýtlary ýa-da resminamalar ýaly resmi çeşmeleri ulanmaýandyklaryny bellediler. Munuň deregine olar öz bilimlerine, gözleg ulgamlaryna, bilermenler bilen gürrüňdeşliklere we täzeliklere daýanýarlar.
Blogerleriň, takmynan, 40%-i internet çeşmeleriniň meşhurlygyny (laýklaryň we tomaşalaryň sany) olaryň ygtybarlylygynyň esasy görkezijisi hasaplaýar. Gatnaşyjylaryň ýarysy diýen ýaly söz azatlygy we awtorlyk hukuklary bilen baglanyşykly ýerli kanunlar barada bilimleriniň çäklidigini aýtdylar.
ÝUNESKO internetdäki mazmunyň hilini ýokarlandyrmak üçin blogerleriň arasynda maglumatlara çynlakaý çemeleşmäni we maglumat sowatlylygynyň derejesini ýokarlandyrmagyň möhümdigini nygtaýar.
