Londondaky Bukingem köşgi düýpli abatlaýyş işleriniň geçiriljekdigi bilen baglylykda ýapylar. Iňlis monarhlarynyň resmi rezidensiýasynda 2027-nji ýyla çenli resmi çäreleri geçirmek bes ediler diýip, The Times habar berýär.
Abatlaýyş işlerine başlanmazyndan öň, bu köşk iň soňky myhmany - Kataryň emiri Tamim ben Hamad al Tanini kabul eder. Dekabr aýynda onuň saparyna garaşylýar, şondan soň köşkde doly derejeli abatlaýyş işleri ýaýbaňlanar.
Köşgüň durkuny täzelemek işleri eýýäm başlandy. Karl III iş otagyny we naharhanany binanyň beýleki ganatyna geçirdi.
Taslamanyň bahasy 369 million funt sterling (462,3 million dollar) diýlip çaklanylýar. Korolyň özi köşgüň demirgazygyndaky şahsy jaýlaryň durkuny täzelemegi maliýeleşdirer. Esasy çykdajylar döwlet gaznasyndan tölener.
Ýapylýandygyna garamazdan, köşgüň käbir böleklerinde 2025-nji ýyla çenli kiçi duşuşyklar geçirilip durlar. Şeýle-de bolsa, resmi kabul edişlikler Sent-Jeýms köşgüne ýa-da Windzor galasyna geçiriler.
2017-nji ýylda, Karl III heniz şazadaka, Bukingem köşgüni esasy kabulhana hökmünde ulanmakdan ýüz öwürmegiň mümkinçiligi barada aýdypdy. Şeýle-de bolsa, täç geýdirilişikden soň, köşgüň statusynyň saklanyljakdygy tassyklandy, ýöne patyşa maşgalasy Londondaky başga bir şa rezidensiýasy bolan Klarens-hausda ýaşamagy makul bilýär.
