25-nji noýabrda Prezident Serdar Berdimuhamedow Amerikanyň Birleşen Ştatlarynyň Senatynyň Energetika we tebigy serişdeler boýunça komitetiniň agzasy, Montana ştatyndan senatory Stiw Deýnsi kabul etdi. Bu barada TDH habar berýär.
Duşuşygyň dowamynda nygtalyşy ýaly, söwda-ykdysady ulgam ýurtlarymyzyň arasyndaky hyzmatdaşlygyň esasy ugurlarynyň biri bolup durýar. Türkmenistanda köp ýyllaryň dowamynda möhüm taslamalary durmuşa geçirmekde iri amerikan kompaniýalary bilen netijeli hyzmatdaşlyk alnyp barylýar. Şunuň bilen baglylykda, bu işde “Türkmenistan — ABŞ” işewürler geňeşiniň uly goşandy bellenildi.
Döwlet Baştutany ýurdumyzyň energiýa serişdelerini ibermegiň ugurlaryny diwersifikasiýalaşdyrmak strategiýasyny durmuşa geçirýändigini we bu meselede öndürijileriň, sarp edijileriň, üstaşyr geçirijileriň bähbitlerini nazara almak esasynda hyzmatdaşlygy ösdürmek ugrunda çykyş edýändigini belledi. Özara gatnaşyklaryň ileri tutulýan ugurlary boýunça pikir alyşmalaryň dowamynda ikitaraplaýyn hyzmatdaşlygy ösdürmek üçin giň mümkinçilikleriň bardygyna üns çekildi.
