22-nji noýabrda, gyş paslynyň öň ýanyndan, türkmen milli aý-gün senenamasy boýunça garagyş döwri başlandy. Bu döwür 15 günläp dowam edip, 7-nji dekabrda tamamlanar diýip, “Türkmenistan” gazetinde habar berilýär.
Bu döwre näme üçin garagyş diýildikä?
“Ak zat alnyňa ýagşy” diýýän halkymyz giň sährada ak öýleri dikip, mydama aklyga sygnyp ýaşapdyr. Garaňky gijeden soň gelýän ak daňdanlarda örüp, säheri ýüzüne sylypdyr. Garagyş günleri bolsa käte maldary-da, daýhany-da kyn güne goýýar. Aralyk ekinleriniň hasylyny ýygnap ýetişmedik daýhanyň käbir ýyllarda ony garyň aşagyndan alýan wagtlary hem bolýar. Hut şonuň üçin-de, garagyş döwri gyşyň ýetip gelendigini öňräginden ýatladýar. Sebäbi käbir ýyllarda akrap maýyl gelip, adamlar gyşyň düşenini hem duýman galýarlar. Şeýle ýagdaýda daýhan-da, maldar hem köp ýitgi çekmeli bolýar. Ine, şuny ýatlatmak üçin-de pederlerimiz gyşyň başyny garagyş diýip atlandyrypdyrlar” – diýlip, gazetde bellenilýär.
Dört bölege bölünen gyşyň iň soňky — 8-nji fewraldan 22-nji fewrala çenli dowam edýän döwrüne hem iň soňky garagyş diýilýär.
Bu ýyl gyşyň maýyl gelmegine garaşylýar. Sebäbi her kyrk ýyldan gaýtalanýan we biri-birine juda meňzeş gelýän ýyllara görä, ýaşulular 1984-nji ýylyň hem gyşynyň maýyl gelendigini ýatlaýarlar. Her näme-de bolsa, gyşy taýýarlykly garşylamak göwne makuldyr.
