Netflix Madridiň “Realynyň” we Braziliýanyň milli ýygyndysynyň wingeri Winisius Žunior barada dokumental film çykarar. Filmiň premýerasynyň 2025-nji ýylda bolmagyna garaşylýar. Netflix bu taslamany “24 ýaşly braziliýaly futbol nyşanynyň durmuşyna we karýerasyna” içgin syn hökmünde yglan etdi.
Dokumental film Winisiusyň giň köpçülige kän belli bolmadyk durmuş pursatlaryny açyp görkezer hem-de onuň futbol karýerasynyň başynda ýüzbe-ýüz bolan meseleleri barada gürrüň berer.
Şeýle-de, filmde futbolda jynsparazlyk we adalat ugrunda göreş bilen baglanyşykly meseleler gozgalar.
Winisius Žunior “Flamengonyň” ýetişdiren oýunçysydyr. Ol 2018-nji ýylda 45 mln ýewro Madridiň “Realyna” geçdi.
Şol wagtdan bäri 24 ýaşly oýunçy topar bilen iki Çempionlar ligasyny utmaga ýetişdi, üç gezek Ispaniýanyň çempiony boldy, üç gezek Ispaniýanyň Superkubogyny we iki gezek UEFA-nyň Superkubogyny utdy.
“Altyn top – 2024” üçin ses berişlikde Winisius Žunior diňe Rodriden yza galyp, ikinji orny eýeledi. Häzirki möwsümde ol “Real” üçin 16 oýna gatnaşyp, 12 gol geçirdi we 4 assist etdi.
Indiki duşuşygy “Real” 24-nji noýabrda “Leganese” garşy geçirer.
