Meksikanyň paýtagty Mehikoda 73-nji “Älem gözeli” halkara gözellik bäsleşiginiň finaly geçirildi. Ýer ýüzüniň iň owadan zenany ady we öz sosial taslamalaryny durmuşa geçirmek mümkinçiligi üçin dünýäniň 130 ýurdunyň wekili bäsleşdi. Ýeňiji 21 ýaşly daniýaly Wiktoriýa Kýer Teýlwig boldy.
Ol Daniýanyň taryhynda ilkinji gezek bu ada eýe boldy.
Wiktoriýa tans we telekeçilik (brilliant satmak) bilen meşgullanýar hem-de hukuk ugruny özleşdirýär.
Ol “Bakylygyň çyrasy” täjini 2023-nji ýylda titulyň eýesi bolan Nikaraguadan Şeýnis Palasiosdan kabul etdi. Täç 18 karat altyn bilen örtülip, brilliantlar we 23 altyn düri bilen bezelendir.
Birinji wise-gözel Nigeriýadan Çidimma Adetşina boldy. Ikinji orny meksikaly Mariýa Fernanda Beltran eýeledi. Üçünji orna Tailanddan Suhati Çuangsri mynasyp boldy. Baýrak alanlaryň sanawyna Wenesueladan Ileana Markes hem girdi.
Soňky gezek Ýewropanyň wekili bäsleşikde 2016-njy ýylda ýeňiji bolupdy. Şonda tituly fransiýaly Aýris Mittener aldy.
“Älem gözeli” bäsleşigi 1952-nji ýylda döredildi we ilkibaşda Pacific Knitting Mills dokma kompaniýasynyň önümlerini ilerletmek üçin gurnaldy – ol, esasan, suwa düşmek üçin geýilýän geýimleri çykarýardy. Wagtyň geçmegi bilen çäre halkara derejesine eýe boldy.
Bäsleşigiň taryhynda onuň eýesi birnäçe gezek üýtgedi, hususan-da, 1996 – 2015-nji ýyllarda oňa Donald Tramp eýeçilik etdi.
Bäsleşige gatnaşyjylar bu platformany diňe bir gözelligi görkezmek üçin däl-de, eýsem sosial meselelere ünsi çekmek üçin ulanýarlar.
