Italiýanyň hökümeti gadymy Pompeýler şäherini syýahatçylaryň aşa köp gelmeginden goramak üçin çäreleri görýärler. 15-nji noýabrdan başlap, syýahatçylaryň sanyna çäklendirme giriziler - günde 20 müňden köp adam gelip bilmez, petekler bolsa myhmanlaryň adyna ýazylyp şahsylaşdyrylar diýip, The Guardian habar berýär.
Bu üýtgeşmeler tomusda rekord dereje - 4 million adamyň arheologiki seýilgähe gelmegi bilen baglanyşyklydyr.
Täze düzgünler gelýänleriň sanyny çäklendirmäge we özboluşly medeni mirasy gorap saklamaga kömek eder.
Arheologiki seýilgähiň müdiri Gabriel Suhtrigel: "Syýahatçylygyň çendenaşa ýaýbaňlandyrylmagy syýahatçylara we özboluşly, näzik mirasa howp abandyryp biler" – diýip belledi.
Syýahatçylaryň sanyny çäklendirmekden başga-da, tomusda syýahatçylyk akymlaryny paýlamak üçin, seýilgähde bolmagyň dowamlylygyna wagtlaýyn çäklendirmeleri girizmek meýilleşdirilýär. Seýilgähiň ýolbaşçylygy syýahatçylara Pompeýler bilen bagly, Stabii, Oplontis we Boskoreale ýaly, beýleki taryhy ýerlere baryp görmegi öz içine alýan alternatiw gezelençleri hödürleýär. Amatly bolar ýaly, agzalan ýerleriň arasynda mugt awtobus gatnawy ýola goýlar.
