ABŞ-nyň Unplugged Performance kompaniýasy amerikan polisiýasy üçin ýörite işlenip taýýarlanan Tesla Model S Plaid elektrokarynyň kämilleşdirilen wersiýasyny hödürledi. Kompaniýa onuň dünýäde iň tiz polisiýa awtomobilidigini belleýär.
Tehniki taýdan bu awtomobil raýat wersiýasyndan tapawutlanmaýar diýen ýaly, onuň aýratynlygy diňe polisiýa awtoulaglaryna mahsus reňk we gapylardaky ýazgylar boldy. Gapy bosagalarynda we öňdäki aýnada yşyk diodly çyra lentalary peýda boldy. Bortdaky kompýutere rasiýa we polisiýa üçin zerur bolan beýleki funksiýalar goşuldy. Daşky dinamik has güýçlendi, indi ony gaty sesli gürleýji hökmünde ulanmak bolýar.
Tesla Model S Plaid 1020 at güýjüne eýe boldy we tizligini 2 sekuntdan az wagtyň içinde 100 km/sag çenli artdyrýar. Elektromobiliň iň ýokary tizligi sagatda 322 km, geçýän menzili 628 km barabar. Superkar jenaýatçylaryň yzyna düşmek we jenaýat ýerlerine gyssagly barmak üçin ulanylyp bilner.
Tesla awtomobilleri ABŞ-nyň polisiýa gullugynda eýýäm köpden bäri ulanylýar. Mysal üçin, 2023-nji ýylda Unplugged Performance üýtgedilen Tesla Model Y awtoulaglaryny Anahaýmyň (Kaliforniýa) polisiýa gullugyna satdy. 2024-nji ýylda kompaniýa üýtgedilen Cybertruck üçin birnäçe polisiýa edaralaryndan sargyt kabul edendigini habar berdi. Olaryň dizaýny ilkinji gezek tomusda görkezildi. Tesla-nyň baş müdiri Ilon Maskyň özi Tesla-ny polisiýa ulaglary hökmünde ulanmak pikirini makullaýar.
