ABŞ-nyň Aeronawtika we kosmos giňişligini öwrenmek boýunça milli edarasy (NASA) Ýupiteriň bu planeta gözegçiligiň tutuş taryhynda iň ýokary hilli suratlaryny hödürledi. Suratlar “Ýunona” zondy tarapyndan Gün ulgamynyň bäşinji planetasynyň golaýynda 66-njy uçuşyň çäklerinde alyndy. Kosmos enjamy 2011-nji ýylda uçuryldy we 2,735 mlrd km ýol geçip, bäş ýyldan soň, 2016-njy ýylda Ýupitere ýetdi. Şondan bäri zond Ýupiteriň we onuň hemralarynyň golaýynda yzygiderli uçup, surata düşürýär we maglumatlary Ýere iberýär.
Zond planetanyň golaýyndan soňky uçuşynyň dowamynda onuň iň ýokary hilli suratlaryny aldy. Mysal üçin, Ýupiteriň demirgazyk polýusynyň iri planda düşürilen suratlary peýda boldy.
Şeýle-de, “Ýunona” Ýupiteriň iň esasy tupanyny – “Uly gyzyl tegmili” surata düşürdi: eger 1979-njy ýylda ol Ýerden iki esse uly bolan bolsa, häzir ol biziň planetamyzdan 1,3 esse uludyr. “Ýunona” tarapyndan alnan maglumatlar “Uly gyzyl tegmil” tupanynyň çuňlugynyň, takmynan, 320 km barabardygyny görkezýär. Şeýle-de, zond gaz ägirdiniň günorta polýusynyň üstünden uçan wagty uly siklonlary surata aldy.
