Sişenbe güni Ýamaýkanyň üstünden “Melissa” atly harasat geçip gitdi. Ol suw joşmalaryna we köpçülikleýin elektrik kesilmelerine sebäp boldy. "Melissa" bu ada döwletiniň taryhynda iň güýçli harasat boldy. ABŞ-nyň Harasat gözegçilik Milli merkeziniň (NHC) maglumatlaryna görä, 29-njy oktýabrda irden harasat Kubanyň kenaryna ýetdi.
Ýamaýkanyň Premýer-ministri Endru Holness ýurdy betbagtlyk zolagy diýip yglan etdi. Resmi maglumatlara görä, takmynan 15 müň adam wagtlaýyn ýerlere ýerleşdirildi. Elektrik üpjünçiligi 530 müň hojalykda kesildi. Ýurduň jemi ilaty 2,8 million adam. Paýtagt Kingstonda häkimiýetler ýaşaýjylara suw joşmasy sebäpli öz ýerlerinden çykan krokodil howpuna garşy duýduryş berdiler.
Senagat ministri Obin Hill harytlaryň bahalarynyň ýokarlanmagyna ýol bermän, zerur harytlaryň üpjünçiligini üpjün etmegi tabşyrdy, sebäbi ýaşaýjylar iýmit, suw we beýleki zerur zatlary ätiýaçlylyk üçin ýygnap başlady diýip, The Gleaner neşiri ýazýar.
CNN-niň maglumatlaryna görä, 7 adam harasatyň pidasy boldy: üçüsi Ýamaýkada, üçüsi Gaitide, biri bolsa Dominikan Respublikasynda.
“Melissa” harasaty iň ýokary, bäşinji kategoriýa çenli güýçlendi, soňra güýç derejesi dördünji kategoriýa çenli pesedi. Netijede, güýçli ýagynlar zerarly Ýamaýkanyň merkezi we günorta sebitlerini suw basdy.
Kubada öňünden takmynan 735 müň adam göçürildi. Iň güýçli zarba Santiýago-de-Kuba welaýatyna düşdi. Harasatyň merkezinde ýeliň tizligi sagatda 205 km barabar boldy.
Harasatyň Bagam adalaryna tarap hereket etmegine garaşylýar.
