Gökdirän binanyň depesinde futbol stadionyny göz öňüne getirip bilersiňizmi?! Eger ýok bolsa, Saud Arabystany ony size hakykatda görkezip biler – patyşalykda nobatdaky NEOM Sky Stadium mega-taslamasy hödürlendi.
Meýdança 350 metr beýiklikde ýerleşip, otelleri, söwda zolaklaryny, türgenler, guramaçylar, žurnalistler hem tomaşaçylar üçin ýerleri öz içine aljak toplumyň bir bölegi bolar. Stadion 46 müň tomaşaça niýetlenýär. Ol ýerden Er-Riýady we onuň tutuş futuristik şäher landşaftyny görüp bolar.
Gurluşygyň bahasy 1 mlrd dollar diýlip hasaplanýar.
Taslama ekologiýa taýdan arassa bolar – stadion, esasan, Gün batareýalarynda işlär, futbolçylar üçin bolsa beýiklikdäki temperatura tapawudynyň öwezini dolmak üçin ösen wentilýasiýa we sowadyş ulgamy gurnalar.
Gurluşyk 2027-nji ýylda başlar we ony 2032-nji ýyla çenli – hut bu ýerde geçirilmegi meýilleşdirilýän 2034-nji ýylyň dünýä çempionatyna iki ýyl galanda tamamlamak göz öňünde tutulýar. Dünýä çempionatyndan soň meýdança konsertler we beýleki uly sport hem medeni çäreler üçin ulanylar.
