ChatGPT-ni dörediji OpenAI kompaniýasy 15,5 mln dollara chat.com domenini satyn aldy we bu şu ýyl domen atlarynyň satuwy boýunça iň uly şertnamalaryň biri boldy.
1996-njy ýylda hasaba alnan bu domen HubSpot-yň tehniki müdiri Darmeş Şaha degişlidi. Ol domeni çat-interfeýslerini tehnologiki ösüşiň geljegi hasaplandygy sebäpli, 2023-nji ýylyň başynda 10 mln dollara satyn alypdy. Birnäçe aýdan soň bolsa chat.com domenini ep-esli girdeji bilen satdy.
Kompaniýanyň baş müdiri Sem Altman domen üçin salgylanmany X (Twitter) sosial ulgamynda paýlaşdy we bu derrew ulanyjylaryň hem KHBS-iň ünsüni özüne çekdi.
NameBio maglumatlar bazasyna görä, şertnama 2023-nji ýylyň mart aýynda baglaşyldy we domen 15,5 mln dollara satyldy, ýöne satyjy we alyjy şertnama barada giňişleýin maglumatlary uzak wagtlap aýan etmedi. Häzirki wagtda chat.com ulanyjylary ChatGPT-niň saýtyna awtomatik taýdan ugrukdyrýar, ýöne OpenAI heniz önümiň adyny üýtgetmedi, bu hem kompaniýanyň brending boýunça indiki ädimlerini soragly galdyrdy.
Hünärmenleriň bellemegine görä, OpenAI kompaniýasynyň bu domeni satyn almagy onuň çat-bot we emeli aň bazarynda öz ornuny berkitmäge ymtylýandygyny görkezýär.
