Italiýanyň aragatnaşyk kompaniýasy ItalyComunica 9,90 ýewro ($11) bahadan Komo kölüniň “howasy” bilen bankalary satyp başlady. Kompaniýa bu bankalarda syýahatçylaryň arasynda meşhur bolan kölüň kenarynda ýygnalan 400 millilitr “100% tebigy howanyň” konserwirlenendigini nygtaýar diýip, CNN habar berýär.
Şeýle başlangyjy öňe sürüji marketolog Dawide Abigneýl boldy. Ol “syýahatçylar çemodanda aňsatlyk bilen daşap biler ýaly” hem-de “nämedir bir üýtgeşik, gyzykly” ýadygärlik sowgadyny döretmek isledi.
“Bu önüm däl, bu ýüregiňizde göterýän täsirli ýatlamaňyz” – diýip, ol interwýuda aýtdy. Ol syýahatçylaryň öýe baryp, bankany açandan soň, ony ruçka goýmak üçin ýadygärlik esbaby hökmünde ulanyp biljekdigini sözüniň üstüne goşdy.
Şeýle-de bolsa, bu pikir hemmäni haýran galdyrmady. Komonyň häkimi Alessandro Rapineze ýadygärlik sowgady hökmünde adaty ýerli önümleri, mysal üçin, sebitiň belli ýüpek şarflaryny makul hasaplaýandygyny aýtdy.
“Eger kimdir biri öýüne birneme howa alyp gitmek islese, bu, eger ol özi bilen bu ýer barada ajaýyp ýatlamalary-da alyp gitse, erbet däl” – diýip, ol belledi.
Komo köli syýahatçylaryň arasynda özüniň diňe bir gözel peýzažy bilen däl, eýsem meşhur şahsyýetler bilen baglanyşygy boýunça-da bellidir. Mysal üçin, howdanyň golaýynda Jorj Kluniniň öýi bar, mundan başga-da, bu ýerde “Kazino Roýal” (Казино Рояль) we “Guççi öýi” (Дом Гуччи) filmleri surata düşürildi. 2023-nji ýylda bu ýere 5,6 milliondan gowrak syýahatçy gelip gördi.
