Sosial ulgamlarda ABŞ-nyň Prezidenti hökmünde saýlanan Donald Trampyň tans edýän wideosy okgunly depginde ýaýraýar. Respublikan partiýasyndan dalaşgär saýlawlarda ýeňiş gazanandygy yglan edilenden soň, Floridada geçirilen mitingde Village People disko-toparynyň YMCA aýdymynyň astynda tans etdi.
Tramp YMCA kompozisiýasyny ilkinji gezek 2020-nji ýylda geçenki saýlawdan öňki kampaniýada ulandy, ýöne, bilşimiz ýaly, kampaniýa onuň demokrat Jo Baýdenden ýeňilmegi bilen tamamlandy. Şondan bäri bu aýdym onuň saýlawdan öňki çäreleriniň nyşanyna öwrüldi. Tramp bu aýdymy respublikaçylardan dalaşgäri goldamaýan Village People toparynyň lideri Wiktor Uillisiň ençeme gezek garşy çykmagyna garamazdan, öz kampaniýalarynda ulanmagyny dowam etdirýär.
Ýatlap geçsek, Associated Press agentliginiň we beýleki iri amerikan habar beriş serişdeleriniň maglumatlaryna görä, Tramp saýlaw wekillerinden 270-den gowrak ses alyp, ABŞ-nyň 47-nji Prezidenti saýlandy. Aýgytly artykmaçlygy dört “durnuksyz” ştatdaky – Demirgazyk Karolinadaky, Jorjiýadaky, Pensilwaniýadaky we Wiskonsindäki saýlawçylaryň goldawy üpjün etdi. Onuň garşydaşy – Demokratik partiýadan dalaşgär Kamala Harris eýýäm öz ýeňlişini boýun aldy.
ABŞ-nyň täze Prezidentiniň kasam kabul ediş dabarasy 2025-nji ýylyň 20-nji ýanwarynda geçiriler.
ABŞ-da Prezident saýlawlarynyň resmi netijelerini tassyklamak prosesi çylşyrymly we her ştat tarapyndan sesleriň aýratyn sanalmagyna baglydyr, sebäbi ýurtda netijeleri yglan etmek üçin bir umumy edara ýok. Şonuň üçin umumy ýagdaýy amerikan medialary we habarlar agentlikleri ýygnaýar.
