31-nji oktýabrda Türkmenistanyň daşary işler ministriniň orunbasary Ahmet Gurbanow ýurdumyzda diplomatik işini tamamlaýan Gana Respublikasynyň Adatdan daşary we Doly ygtyýarly ilçisi Erik Owusu-Boateng bilen duşuşdy. Bu barada Türkmenistanyň DIM-nde habar berdiler.
Ilçi diplomatik işini Tähran şäherinde oturýan ýerinden alyp barýardy.
Duşuşygyň dowamynda taraplar iki ýurduň özara gyzyklanma bildirýän ähli ugurlarynda ikitaraplaýyn gatnaşyklary pugtalandyrmaga ygrarlylygyny tassykladylar. Ikinji syýasy geňeşmeleri, şeýle hem iki ýurduň işewür toparlarynyň arasynda duşuşyklary geçirmegiň mümkinçilikleri ara alnyp maslahatlaşyldy.
Duşuşygyň ahyrynda Türkmenistanyň Daşary işler ministriniň orunbasary ikitaraplaýyn türkmen-gana gatnaşyklaryny pugtalandyrmaga goşan goşandy üçin ilçä sagbolsun aýtdy we geljekki işlerinde üstünlikleri arzuw etdi.
Öz gezeginde ilçi Türkmenistanda diplomatik wezipesini durmuşa geçirmekde berlen hemmetaraplaýyn goldaw we ýardam üçin türkmen tarapyna tüýs ýürekden hoşallyk bildirdi.
