Sony kompaniýasy 2026-njy ýylyň 11-nji dekabrynda “Jumanji” franşizasynyň dowamyny çykarar diýip, Deadline habar berýär.
Onuň ilkinji görkezilişi adat boýunça, seriýadaky öňki filmler ýaly, Roždestwo baýramynyň öň ýanynda bolar. Filme ýene-de Jeýk Kezdanyň režissýorlyk etmegine we baş keşplerde Dueýn Jonsonyň, Kewin Hartyň, Jek Blekiň we Karen Gillanyň oýnamagyna garaşylýar.
“Jumanji” filminiň asyl nusgasy 1995-nji ýylda surata düşürilip, onda baş keşpleri Robin Uilliams bilen Kirsten Danst janlandyrypdy. Bu Kris Wan Ollsburgyň adybir çagalar romanynyň uýgunlaşmasydy. Film dünýäde 262,8 million dollar girdeji gazandy. 1996-1999-njy ýyllar aralygynda çykan “Jumanji” multserialy şonuň esasynda surata düşürilipdi, 1996-njy ýylda bolsa “Milton Bradley Company” kompaniýasy stoluň üstünde oýnalýan adybir oýny döretdi.
2017-nji ýylda Sony bu sýužet esasynda täze - “Jumanji: Jeňňelligiň çagyryşy” filmini çykaryp, 962,5 million dollar girdeji gazandy. 2019-njy ýylda filmiň dowamy bolan “Jumanji: Täze dereje” çykdy. Üç film bilelikde döredijilere 2,02 milliard dollardan gowrak girdeji getirdi.
