Prezidenti Serdar Berdimuhamedow Türkmen alabaýynyň baýramy mynasybetli ýurdumyzyň raýatlaryna Türkmenistanyň «Türkmenistanyň at gazanan itşynasy» diýen hormatly adyny dakmak hakynda Permana gol çekdi.
Resminama laýyklykda, «Türkmenistanyň at gazanan itşynasy» diýen hormatly ada:
- Türkmenistanyň Goranmak ministrliginiň Türkmen alabaýlarynyň merkeziniň müdiri Orazmyrat Rejepgulyýewiç Saparow,
- Lebap welaýatynyň Hojambaz etrabynyň “Gyzylgum” daýhan birleşiginiň at çopany, hususy itşynas Begenç Aganýazowiç Hanyýew mynasyp boldy.
Bellenilişi ýaly, bu hormatly atlar türkmen halkynyň baý medeni mirasynyň aýrylmaz bölegi bolan alabaý itlerini häzirki zaman dünýä ylmynyň gazananlaryny ulanmak arkaly talabalaýyk saklamakda, ýetişdirmekde, köpeltmekde we olaryň şan-şöhratyny dünýä ýaýmakda, bu ugurda halk seçgiçiligini ösdürmekde hem-de kämilleşdirmekde, dünýäniň dürli döwletleri bilen itşynaslyk ugrunda halkara hyzmatdaşlygyň gerimini giňeltmekde, milli itşynaslyk mekdebiniň iň gowy däplerini wagyz etmekde hem-de ornaşdyrmakda gazanan uly üstünlikleri üçin we köp ýyllaryň dowamynda çeken halal, yhlasly zähmetini nazara alyp berildi.
